في مرة من المرات وانا ماشي البلد من الأبيض بواسطة حافلات دبيكر بمحلية القوز وفي موقف الصالحين وجدت دفعتي وزميلي بالمرحلة الابتدائية بكرتالا (حامد نواي أو حامد الحرس) عنده عرجه كان قد انسكر باكرا في فخذه وهو (كمسنجي) المهم سلامات حبابات وكلامات قالي يا دفعة امشي شوف ليك مقعد في الحافلة واحجز محلك.. مشيت حجزته بوضع الشنطة (والقوقو أو أبكر ارح). وجيت نازل تاني وجلستة في كرسي من كراسي ستات الشاي(عرفته كيف يا سعادة البرهان شايفك أمس بعد الفطور وسط قواتك المسحلة بمنطقة الباقير وسوبا بالخرطوم.. وفي طريق العودة أخذت لك جلسة وجمبه كده مع ستات الشاي في امسيه من أمسيات السابع من رمضان ١٤٤٤ هجرية اعمل حسابك من الجنزبيل والتهاب المصران وحاجات كده كده ؟؟؟ .. نعود إلى موقف دبيكر بالصالحين حيث مدينة الأبيض طبعا انا لا قاعد اشرب شاي لا قهوة ولا سجائر ولا تمباك ولا حتي (مريسة). ههههه عارفكم كان دايرين تقولوا شنو.!! …وحتى احلل جلوسي طلبت من ست الشاي وقلت لها اديني (نعناع او جنزبيل) وما هي إلا لحظات دفعتي حامد قال خلاص تعالي اركب الحافلة تمت. وتحركنا طواااالي بالزلط ونزلنا شمالا بعد كازقيل حيث شارع البركة المدينة. (كان زماااااان اسمها جعيبات) شايف والي جنوب وكردفان الجديد محمد إبراهيم عبدالكريم.. أمس في خطابه بكادقلي. قال في جعبته الكثير.. ههههه طبعا يالسيد الوالي انت في جبال النوبا وأكثرهم عجم.؟؟ لا يعرفون اللغة العربية جيدا انصحك ذي كلمات (جعبه وجعبات) دي حاول تغيرها المره الجايه لانها من الكلمات المعفنات (خاصة ناس حزب الأمة يتربصون بك ليفشلوك). طبعا في اللغة العربية الجعبة دائما تكون في المؤخرة او الخلف. وانت تقصد عندك حاجات كتيرة لصالح انسان الولاية بعيدا من الحزبية والجهوية يعني حاجات كتيرة جاية في جعبتك وره. سياسية واجتماعية واقتصادية وتحقيق السلام وغيره..!؟؟ . طبعا في السفر الناس تتعارف وبعد (حق الله. بق الله). تعرفت على الزول القاعد جمبي وعنده كمية من الكراتين والاكياس ولابس جلابية وصديري وسروال ومركوب. (ما أجملك يا بلدي يا حبوب) ومن خلال التعارف الزول طلع مساعد طبي. وكان في الجيش وهسي ماشي سوق دبيكر. وقال بعدها ماشي (الكافير حلتنا) قال عندي دفعتي اسمة هجو إبراهيم نورين كنا سويا في غرب السودان بالجنينة منطقة( كنقوا حرازا) قلت سبحان الله هجو ده ود خالي!!.. امي (سيدة نورين) وكمان متزوج شقيقتي (حواء) قال لي أم رقية ومنازل..ااااي وكمان انا ذاتي زرتكم في رمضان وانا كنت هناك وحصل انقلاب ٢٨ رمضان وتم فيه إعدام الضباط ديلاك.؟؟ وقلت له كان قائدكم اسمة البرهان كان ملازم ولا نقيب ما عارف.؟؟ قال هسي الرئيس ده هو ذاتو.. البرهان قلت له لكن مالوا يا أخي ما داير يدوس الابنص للنهاية.؟؟ . قال لي اسكت ساكت انت لسع ما شفته حاجه.. عمك ده خطر خطر…وما وراكم حاجة . وبرااااك تشووووف. الكلام ده كان قبل تلاتة سنة تقريبا. وسبق أن كتبت عن البرهان ووشبهته بحيوان (ابودربان) وكلكم تعرفون صفات هذا الحيوان وكيف يقاتل.. هههه أمس سمعنا قالوا القوات المسحلة لم تحضر التوصيات النهائية لورشة الإصلاح العسكري وفجأة ظهر سعادة البرهان في الباقير بياكل في العصية مع قواتة لو ما اخاف الكضب (بملاح كجيك وكول) وانتم عارفين عفانات الكول ( واسمه ود ميسر تأكله باليمن وتشمه بالايسر) ولسان حاله يقول لناس (قحت) وعلى رأسهم خالد سلك.. كلامكم ده كلام الطير وانا قاعد في الباقير..؟؟ وعن حادث السفير الأمريكي أمس في شوارع الخرطوم. نقول له ألف سلامة. عموما كلام الطير في الباقير. دائما ما يدور عن أحداث عجوبة وكيف خربت سوبا ؟؟ وانتو قايلين السفارة الامريكية في سوبا قاعدة ساكت؟؟!! هذا اقتراح وكلام من كلام الطير.
المك /داؤد ابوكلام داؤد. الخميس الثامن من رمضان ١٤٤٤هجرية الموافق ٣٠/٣٠/٢٠٢٣